Nov 28, 2011

Pegaso, Centauro e le Unicornio

Pegaso, filio de Poseidon e Medusa
expandeva su alas e levava se del terra
e volava verso le Regno Supra Nubes
pro cercar le Unicornio

Su amico Centauro non habeva alas
ma anque voleva cercar le Unicornio
dunque ille al Oriente iva
al montania le plus alte del mundo

Post un volo longe e multo fatigante
Pegaso attingeva le Regno Supra Nubes
videva le palatios decorate con auro
fontanas susurrante e jardines in flor

Ille vagava trans vias e stratas
plenate de gente con mantellos de seta
e quereva sovente del Unicornio
ma nemo poteva dar un responsa

Post un viage de quaranta septimanas
le Centauro arrivava in le Regno Supra Nubes
e in un parve vico obscur
incontrava le Pegaso disanimate

"Veni Pegaso, mi car amico,
que nos va a Sophia, le sage femina!
Forsan illa nos pote dicer
ubi trovar le Unicornio"

Alora Centauro e Pegaso iva
a Sophia, le vetere, sage femina,
poneva timidemente su question
e recipeva le sequente responsa:

"Vos va trovar le Unicornio
ubi le minus vos lo expecta
Seque le vento appellate Borealis
ille sape le responsa que vos cerca"

Ergo, le ambes sequeva Borealis
le via longe al frigide nord
ma quando illes poneva questiones
Borealis sempre remaneva silente

Tosto silentio, frigor e despero
Centauro e Pegaso in toto cingeva
e camminar plus illes refusava
abandonante tote spero

Sed alora, subito, per surprisa
le responsa veniva a illos
un foco interne los igniva
e in su frontes excresceva cornos

Illes descendeva in basso al terra
le cornos dispareva del frontes
ma le foco interne que los igniva
nunquam sera extinguite

Nov 26, 2011

Inspiration

De novo tu es ci
io ha attendite
tu lumine vivificante
tu energia vibrante

Remane con me iste nocte
e flue in me
imbracia me
como un unda oceanic

Recolta mi sonios
e disperge los sur le mundo
como calide guttas
de sublimate passion

Nov 25, 2011

Io trovava mi proprie musica



Un die io trovava
un melodia que era solo le mie
Chordas sonava, tonos se misceva
harmonias aperiva le serratura
al tresor celate del anima
ubi in loco de auro
il ha cantos plenate
con le suave dulcor del celo

Io levitava in alto
leve como un flocco de nive
con le cithera in mi manos
tosto vidente le nubes
distantiar se in basso

Io sonava mi musica
a tote le mundo
e sanava su vulneres
con le molle tonos del chordas

E io audiva
como le universo resonava
de milliones de cantos
e su sonos diverse
vibrava gaudiosemente
in cata cellula de mi corpore:

Le voce del Cosmo
majestatic, irresistibile
infinite, eterne
belle e beate

Nov 17, 2011

Le umbra

Un homine dispareva
ma su umbra restava
illo continuava vagar
trans stratos e parcos
sequeva gente a su domos
e los videva addormir se

In le nocte illo se fusionava
con le obscuritate sin limite
e in le die se celava
in locos tenebrose
Su tempore jam habeva passate
ma illo ancora escappava le fato

Visitava locos que illo recognosceva
e regrettava cosas que illo faceva
ma le historia jam esseva scribite in petra
e le futuro consisteva de nihil

Un die quando le sol brillava fortemente
le umbra se dissolveva pro tempore eterne

Nov 16, 2011

Le oculo interior

Le poesia intrinsec del vita
face cata die unic
revive omne le colores
e trova le fragrantias celate

Le menses e le annos passa
ma in le profundo nihil se cambia

Le momentos sempre prende
nove formas que tranquillemente
son observate del oculo interior

Nov 15, 2011

Ante le evelia

Le dolor es solo
un crusta sur le anima
que cela le intrinsec
essentia vivente
que habita in pacific
serenitate gaudiose
non toccate del frigor
o calor del mundo

Ibi io vole ir
per pellar via
stratos intoxicate
de illusiones
e ambitiones
e le ego false

Io pote
comprehender
qui io es
per realisar
qui io non es

Pro eveliar me
io debe apperciper
que io ancora dormi

Nov 11, 2011

Toto passara

Accidentes, battalias
catastrophes, dolor
effractiones, fame
guerras, hysteria...

...toto passara, alora:
preoccupa te de nihil

Invasiones, jelosia
kleptomania, lucto
menacias, negligentia
odio e pena...

...toto passara, alora:
preoccupa te de nihil

Querelas, repugnantia
sadismo, timor
ultrage, vengiantia
xenophobia e zoolatria...

...toto passara, alora:
preoccupa te de nihil

Nov 10, 2011

Post le tempesta

Tracias del tempesta
tarda in aria
rumpite arbores
attesta del vandalismo
del ventos furiose
que porta destruction

Post le ruito
durante un momento
regnava silentio
ma ora le aves
cautemente comencia
cantar su dulce melodias

Nov 9, 2011

Anomalias temporal

Mori hodie
nascera deman
memorara ante
su nascentia
qui illa era
ante existentia

Collige hodie
fragmentos que va
tosto transformar se
e devorar minutas

Crescente in le momento
illa lassa tracias
alicubi inter
comencio e fin
attendente le die passate

Nov 8, 2011

Le fenestra al eternitate

Le silentio
es un fenestra
al eternitate

Proque illo
manca sonos

e sin sonos
manca formas

e sin formas
manca limites

e sin limites
solo existe infinitate

infinitate
e eternitate

Nov 6, 2011

Dolor dormiente

Durante le nocte dormi le dolor
le lacrimas ha evaporate
e le mente tormentate
ha fugite a sonios profunde

Le musica ha cambiate a silentio
ma le voces ancora remane
patientemente le suffrentia attende
a eveliar se quando venira le alba

Nov 5, 2011

Refluxo

Non pone al vela
jecta via tu remos
lassa le mar governar

le refluxo te tira
al oceano pacific

Nov 4, 2011

Manos luminose

Canta a me
tu plus belle canto
revela tu spirito
e lassa me toccar lo

con mi manos luminose
nascite in sonios
formate de spero
e movite del amor

Nov 3, 2011

Sexanta annos con interlingua

Sexanta annos
con interlingua
le juvene idioma
con radices ancian

Facilemente apprendite
e capabile exprimer
trovatas scientific
e contos magnific

Logicamente structurate
e plenate con beltate
non planate ma naturalistic
con un objecto realistic

Dante nove possibilitates
de communication
inter communitates
de qualcunque nation

Parlate con delecto
inter visionarios
unificante dialectos
de populos varie

Nostre lingua ha
un ver potential
que illo devenira
le solution global!


Nov 1, 2011

A mi amante

Le noctes hibernal gania in longor
sed in memorias vive le estate
e cresce ancora nostre amor
-que illo durara un eternitate!