Jul 14, 2012

Nemo pote occider un sonio


 Io volerea viver in un universo
ubi John Lennon non era occidite
ubi le pace habeva un ver opportunitate
e ubi le soniatores ha le autoritate

Un universo ubi Amor es rege
e Musica le regina
ubi le homines son libere
e ha tote le tempore que illos besonia
pro facer lor creativitate florescer

Io vide John Lennon al strata in Nove York
con le dorso curve e gris capillos e barba
ma su oculos son attentive e jocose
ille me reguarda e dice pensivemente
in su dialecto typic de Liverpool:
-Es tu le soniator qui da vita al soniatores?
Io responde con su proprie parolas:
-"Tu pote dicer que io es un soniator,
ma io non es le sol."
Ille responde:
-Continua soniar, mi amico!
E non oblida que nemo pote occider un sonio...

Jul 13, 2012

Ille qui vide es vidite

Le observator qui specta es observate
ille qui vide es vidite
le fortia emana pro postea retornar

Ille qui cura es curate
Le cyclos del energias da le mundo su perfection
lo imperfecte sera perfecte
e lo perfecte debe esser transformate
preter multe stadios de imperfection

Le camminator qui vade deveni le camminata
Le camminata cammina le camminator
e le via que ille percurre
deveni marcas in le spirito
que crea texturas mirific

Le vita que vive es vivite
in le cyclo del vita non ha spatio pro le morte
porque illo es un circulo sin fin
in le qual le camminator observa le via
e crea ornamentos in su anima
con structuras sempre plus belle

Jul 11, 2012

Distante femina


Ultra le silva, laco e agros
io videva a distantia un parve puera
illa jocava e ballava
presso un parve cabana

Io comenciava vader inter arbores
a vices intervidente la trans le folios
al fin io attingeva le costa del laco

Io vadeva al aqua
e comenciava natar in su direction
spectante in alto a su figura
io videva que illa era un juvene femina
qui sedeva a un chaise e prendeva le sol

Su belle aspecto me dava fortia
vincer super le undas
e attinger le altere latere del laco

Io comenciava vader trans le agros
e videva que le juvene femina
era un dama matur
qui laborava in su jardin
e plantava flores in le terra

Al fin io arrivava
e stante ante illa
io videva un vetula
de novo reposante in su chaise

Illa surrideva  ma diceva nihil
Detra su cabana
io videva un abysso precipitose

Jul 10, 2012

Poseidon


        Poseidon, nos videva tu cruel figura        
elevar se del fundo obscur del mar
del cecante sol tu facie rutilava
io videva tu bucca de ira spumar

Al costas de Aceh e Siam surgente
tu sparniava necuno, plenate de odio
como tropheos del attacco lavante
al mar: homines, arbores e domos

Ha nos prendite troppo de tu pisces?
Jectate troppo immunditias a tu domo?
Ha nostre naves e gran submarinos
disturbate tu calma del fundos?

Esque un die tu reprendera
le terra lassate ante multe annos
e nostre citates tornara
a residentias pro sepias e corallos?

Ha misericordia, deo de oceanos
in iste mundo que nos vive in pace!
Audi le preces del maldivianos
e retene tu aqua feroce

Con folle homines, que tu ha patientia!
Un die illos respectara
le leges universal del natura
ancora animales, illos deos devenira    

Jul 9, 2012

Transplantation facial


Un homine moriva
perforate de bollettas mortal
Le vita abandonava su corpore
ma un parte era salvate:
on secava via su facie
pro dar lo a un altere homine
qui dece-cinque annos retro
in desperantia
volente perir
con un arma fusilava a su capite
ma fallente suicidar se
ille in vice deveniva
le homine sin facie

Le operation succedeva
e le surriso, mimica e grimasses
de un homine morte
es possedite de alcuno altere
qui in iste maniera reganiava
un poco de su dignitate

Jul 8, 2012

Le grattacelo existential


Io va per ascensor
cata etage es un anno
le cameras son identic
ma le mobiles differente
Io recognosce certe facies
ma alteres son estranie

Mi labor es le mesme
ma cata die cresce
mi responsabilitate
L'autos al strata in basso
deveni sempre plus parve
Contextos se clarifica
ma certe detalios
perde significantia
Al distantia dispare
le horizonte

Le die quando io
attingera l'ultime etage
io scalara al tecto
e vadera trans le bordo
pro planar trans aer frigide

Esque io cadera al terra
o ascendera ultra le nubes?

Jul 7, 2012

Le Dea del Vita


Illa caressa
e anima e corpore
Illa da sempre
su benediction

Le Dea del Vita
Amor e Compassion
qui vive al fonte
del Luce Eterne

Illa es sacre
e anque sensual
su patre, le Celo
su matre, le Terra

creava insimul
Le Dea del Vita
Regina del bontate
gaudio e placer

Jul 6, 2012

Ille qui salva un vita...


"Ille qui salva un vita salva un integre mundo"
Talmud

Mundos nasce e mundos mori
tanto simile le un al altere
ma al mesme tempore tanto differente
Galaxias se forma e dispare
illos son governate del mesme leges
ma intra iste leges illos crea
sempre nove variationes

Certe mundos vulcanic
se lacera, explode e mori
durante que alteres
post annos se frigida
su continentes deveni rigide
e illos attinge vetulessa
e solo mori quando
su stellas son extinguite

Jul 4, 2012

Homines son stellas


Homines son stellas
alcunos son grande
illos arde intensivemente
e son comburite prematurmente

illos deveni supernovas
e exclara le galaxia
un breve momento
ante su extinction

alteres cale tranquillemente
con patientia durante eones
e face calide
su amate planetas
ma in le galaxia
illos son incognite

Jul 3, 2012

Cata amor es unic

L'amor que io
experientia con te
solo pote
exister inter nos
e l'amor que io senti
a ille o illa
nunquam sera le nostre
quia cata amor es unic
e cata vice quando de novo
nos lo incontra
illo es neonate

L'amor nos surprende
et evelia incognite
aspectos spiritual
Illo nos face e forte
e vulnerabile
dante le spero del paradiso
ma sin garantias
pois que amores unic
crea destinos unic

Jul 2, 2012

Interlingua



Interlingua,
le lingua inter nos
idioma le qual
comprende vos

Lingua de scientia
e anque de cultura
conversation, chat
e litteratura

Su grammatica es certo
vermente minimal
facile ma non simple
e totalmente natural

Illo porta le essentia
del hereditage cultural
de tote le mundo
occidental

Interlingua es le clave
que facilita studiar
le linguas romanic
e rapidemente progressar

in studios etymologic
del moderne idiomas
e lor radices classic:
sempiterne parolas

Comprendite hodie
de centos de milliones:
un lingua franca
con multissime functiones

Preservante le tote
ricchessa de su fontes:
Italiano, Anglese, Francese,
Espaniol e Portugese,

plus facile de Anglese
e vermente neutral:
le alternativa melior
pro le lingua international!

Jul 1, 2012

Le solitari Georgio



Le solitari Georgio
ultime de su specie
ha morite, in le etate
de cento annos

Expellite de iste mundo
de homines sin compassion
que vos reposa in pace,
Chelonoidis nigra abingdonii