Mar 31, 2013

Le tempore resuscitate

Le hiberno finiva
e le anno moriva
Le primavera veniva
e lo resuscitava

Le terra blanc e le celo obscur
dispareva in fluvios
e in vice se revelava
le terra verde e le celo azur

Le sol combure
le mute, frigide dolor
que durante un medie anno
permeava le solo

Ancora un cyclo comencia
in su totalitate simile al passate
ma le detalios son differente

Le gaudio e le lucto
continua su dansa capriciose
a vices con rapide, ardente passos,
e a vices con bracios
passionatemente melancholic
in lente motion super su capites

Le tempore resuscitate
me da signo a sequer lo
io pone questiones
ma illo non responde
ergo io mutesce
e in le mesme momento
rediscoperi le paisages primaveral
plenate de spero

Mar 28, 2013

Vetere photographias


In un armario io ha un bellemente taliate cassetta
ibi il ha multe vetere photographias
alcunos grande, altere parve
certe son in nigre e blanc
Io reguarda mi familia, amicos e parentes
a vices surridente, a vices grave
alcunos jam morte, altere ancora vivente

Forsan io los ponera in un album de photos
e los assortira in ordine chronologic
pro mitter in loco le fragmentos del tempore
Forsan io los scannara
pro dar los immortalitate digital
ma isto occurrera un altere die
proque le nunc me voca e dice a me:
"prende le camera, exi e carpe diem!"

Mar 27, 2013

Le casa grande

le casa grande es situate a un distantia de 3417 passos
le celo deveni plenate con flores auree

al exterior es nocte
ma al interior, die

le pensatas me eleva
le briccas del strata fragra de herbas

le passos crea
musica minimalistic
-un mantra benefic del corpore

solo le via es importante
le casa grande ancora sembla esser parve

le vetere domo ha disparite
ma su fragmentos supervive
como partes de un mosaico invisibile

io non cognosce le homines
e non sape si illos me reguarda
io vide lor scalias
e vagemente senti lor odor

le guttiera es plenate
de aqua verde
ergo le spero vive

1437 passos remane usque le casa grande
io senti su potente presentia
pensa de su alte scalas
e le porta pesante

le flores auree del celo
ancora remane
illos dansa
e lor pirouettes dissolve
dubitas e timores
e dona un lustro gentil
al grande livide casa

Mar 26, 2013

Aures del eternitate

Nunquam oblida
que tu anima debe cantar
proque tu essentia
es musica belle e pur

Silentio es le spatio
trans le qual le tonos viagia
Quando sublime harmonias
se extende inter stellas
le vita cresce
e porta tote tu sonios
al aures del eternitate

Mar 25, 2013

Attendente al nocte

Quando venira
le nocte silente?

Le die fatigate
ja ha entrate
al dormitorio

In lavatorios
horas somnolente
brossa e brossa
su jalnastre dentes

Le minutas ancora
reguarda le ruitose
programmas televisive
ma le torpide secundas
que sede presso illos
sovente oscita

Sperabilemente
le liberator
nigre, quiete
tosto, tosto
venira

Mar 24, 2013

Alpha beta

io es poeta

rivieras ha un delta

vos vide un cometa

illos mangia feta

ratto in un trappa

le vacca dice "mu"!

 tu melodi'

  pro bouzouki

 cura mi phlegma

vide tu Pantalon?

hysteri'

 
colpa mi collega  

Mar 23, 2013

Nos respira insimul

Nos respira insimul
io cresce intra te
tu es mi matre
tu es mi toto
Io audi le battimento de tu corde
illo es mi incessante musica
Io sempre vole esser presso te
tu es mi origine
Hodie tu es tote mi mundo
e nonobstante que un die
io stara sur mi proprie pedes
tu sempre remanera
Le Matre
le fonte de mi vita

Nos respira insimul
tu cresce intra me
tu es mi infante
tu es mi toto
A vices io senti
como tu te move
e quando io ascolta attentivemente
sembla a me que io audi tu corde
Io te desira
tote le bonitates del vita
e ben que tu un die
vadera via sur tu proprie cammino
tu sempre remanera
mi amate infantetto

Mar 22, 2013

Bazar bizarre

Io visitava le bazar bizarre
et ibi trovava cosas peculiar:
bicyclos de Bulgaria e broches de Burgundia
bonettos de Bosnia e Biblias basc
bottas de Belgica e bira de Bavaria
balalaikas bielorusse e banjos de Boston

Io visitava le bazar bizarre
et ibi trovava cosas peculiar:
bestias bicipite, butyro in bottilias
blancastre bivalvos e blattas blau
brochures con burlas e buttones baroc
blusas con broderias e bracas brun

Io visitava le bazar bizarre
et ibi trovava cosas peculiar:
bovellos britannic e boas de Bolivia
brandy de Bretania e bussolas byzantin
berillos de Bohemia e balsamo balinese
bananas brasilian e bicarios de Burundi

Io visitava le bazar bizarre
et ibi trovava cosas peculiar
comprava multe inutile merces
debeva ingagiar tres portatores

Mar 21, 2013

Adeo

Le lacrimas se misce
con le guttas de pluvia
le sol deveniva obscurate
e nostre amor pallidiva
ma totevia:
dicer adeo es tanto difficile

Mar 20, 2013

Viage sin fin


Io tende mi vela solar
e lassa le vento stellar apportar mi nave
ad le profunditate plenate de luces lontan

Io ha pyxides con me:
vasculos con memorias
A vices spectante le passato
io trova fortia pro mirar le futuro

Isto es le viage sin fin
le stellas se move
con lentor astronomic
Un viage ubi io incontra me mesme
quando le profunditate cosmic
aperi le spatios del spirito

Un viage in phantasias realistic
e realitates phantastic
in le dimensiones del mente

Le sol se retira
ma le stellas deveni plus distincte
io mesme deveni un corpore celeste
e mi pensatas es eterne
quia mesmo si illos viagia
con le rapiditate del lumine
illos remane immobile in le bracios del galaxia

Le vela solar me trahe sempre avante
o forsan al latere
Io non plus sape le direction
de mi viage
ma isto non plus importa
solo le movimento es essential
tanto tangibile in mi parve nave
ma quasi imperceptibile
pro le observatores al terra

Mar 19, 2013

Oriente ardente

Viage in le Oriente Extreme
le sol arde al pelle
e le species in le bucca

Mar 18, 2013

Le magico e le maga

Olim il habeva un magico
qui se mesme escamotava
ma quando non plus existeva
in terror ille clamava

Retornar ille voleva
al vita et existentia
escappar del cruel fato
causate de imprudentia

Non exister es triste
un ver dolor pro le mente
ille solo pensava del retorno
al stratas plenate de gente

Post un hora passava un maga
qui rarmente malfaceva
illa diceva un formula magic
e le magico reappareva

Le magico e le maga
se incantava mutualmente
se maritava e faceva
apparer un belle infante

Mar 16, 2013

Vive e lassa viver

Le pan del uno non debe esser le morte del altere
Lassa le compassion diriger tu actiones
e tracta omne le vivente esseres
como fratres e sorores

Mar 14, 2013

Le citate


 Le citate cresce
e se transforma
domos dispare
e altere prende
lor placia
similemente
le gente son replaciate
gradualmente 
insensibilemente


Io vade
del station del sud
al centro del urbe
e vide
domos nove e antique
gente vetule e juvene
io vide fragmentos
del historia
accompaniate del
ruito hodierne
eras se misce
sta immobilemente
le un presso le altere


Le stricte vicos
del urbe vetere
defia le tempore
se cela
del traffico
permittente allegre
touristas passar
alcun al vice

 
Le citate es
le summa del historia
ma le plus vetere tempore
ha disparite pro sempre
sepelite sub
le fundamentos massive
del alte edificios:
solo remane ossos rumpite
sub le terra


Si io poterea
hic vader
cento annos retro,
cinque-centos annos retro
que io viderea?
qui io viderea?
esque io poterea
recognoscer mi citate
o serea illo
estranie?


Si io poterea
hic vader
post cento annos,
post mille annos
que io viderea?
qui io viderea?
esque io poterea
recognoscer mi citate
o serea illo
estranie?


Io retorna
al momento presente
a mi passos
trans le stratas urban
al experientia
del majestatic
monumentos
del vita
e del creativitate 


Mar 13, 2013

Le vita ante un schermo

Le mundo se aperi
multe paises, multe linguas
multe textos, films e musica
Information e distraction,
e peccatos e salvation
al distantia de un pauc clics
Nos vide e audi
ma fragrantias, sapor
e tocca non nos attinge

Nos pote viagiar a multe citates differente
e flanar trans incognite stratas
con le adjuta de Google Street View
sin mover se del chaise

Connectite ma isolate
singule in le rete del communitate
nos comparti nostre vitas con estranieros
Toto debe esser conservate
in le memoria collective
del gigantesc mundo digital

Quando nos exi del domos
le schermo grande es extinguite
ma in le tasca nos ha le schermo parve
Tosto illo sera tirate foras
e le digitos comenciara
su dansa febril del sms

Sempre in linea
isto es un tanto forte droga
nos porta le virtualitate
foras, al realitate
Nos vole captar le vita actual
con nostre cameras cellular e tweets
e sublimar lo a
in le mundo de codices binari

Unes e zeros in filas sin fin
que deveni codices, patronos e matrices
edifica un mundo meraviliose
un realitate parallel
a ubi nos escappa ex le tristessa del vita quotidian

Cata secunda debe esser plenate con activitate
nulle momento sia guastate
il ha tante cosas a facer
un mundo integre de opportunitates attende
Inquietude, haste febril!
Como trovar tempore pro toto?

Ruptura de currente,
le schermo es extinguite
Que facer?
Avante con le libro
...re programmar :)

Nostre vitas deveni ben documentate
ma va tote isto esser preservate
pro le scrutinio del historicos futur?
Quanto longe va le ventilatores murmurar,
le schermos lucer
e le discos dur volver?

Si nostre mundo digital supervivera,
potera le historicos futur cerner
lo que es importante ex iste massa de information?
Trovar le pensatas original
inter tonnas de banalitates?
Va illos esser fascinate de nostre tempore peculiar
o cadera nos in oblivion?

Mar 11, 2013

Le arca de Huiber


Le arca de Noe ha resurgite
e ora sta in le porto de Dordrecht
Le vision veniva
a Johan Huiber in un sonio

Durante vinti annos ille construeva
le plus reputate nave del mythologia
exactemente secundo le description biblic:
130 metros de longor, 29 metros de largor
e un altessa de 23 metros

Un phantasia antique deveniva realitate
o ha iste nave olim ja existite?

Mar 10, 2013

Le arbore del humanitate

Le humanitate es un arbore
con multe brancas
ma solo un trunco

Inter le folios sede
multe differente aves
e cata un ha su proprie melodia

Certe folios gemma
e altere marce
ma le arbore remane verde

A vices le arbore floresce
e dissemina al largo
le dulce fragrantia de nobile ideas

Constantemente cresce, iste arbore
Como grande pote illo devenir?
Quante brancas pote le trunco supportar?

Le sol del creativitate
face le fructos maturar
tosto illos cadera

e rolara al basso del collina
pro finalmente lassar
su semines entrar al terra

e assi crear nove arbores:
illos son le vascellos que portara
le humanitate ad altere mundos

Mar 7, 2013

Incantate mundo interior



Forsan tu ha oblidate
qui tu es
e que tu ha le clave
a un incantate mundo interior
Nemo lo pote prender via de te
Un die tu de novo va memorar
ubi illo es celate
Nihil pote obstruer
le vibrationes del canto del veritate

Lassa le sol del compassion
lucer super toto
Lassa lo calmar le tempestas del mente
e postea: specta le responsas,
al quasi oblidate questiones,
in le aqua pacific del anima

Mar 6, 2013

Tosto nocte

Io vole esser sol
retrovar mi proprie pensatas
in le silentio

Mar 5, 2013

Homines et angelos


Homines son angelos dormiente
et angelos son gente qui se ha eveliate
Si tu vide un angelo, tu mesme es un angelo
e le celo sera sin limites quando,
un die, tu ascendera

Mar 3, 2013

Duo annos insimul

Hodie, duo annos retro
nasceva nostre amor
Nos ha vadite insimul
sur sentieros coperite de nive
e sur pratos herbose
Sur alte montanias
e in valles
Durante dies insolate
e sub le celo plenate de stellas
Nos ha spectate aves
e trovate delecto in lor cantos
Nos ha ridite
e nos ha plorate
Nos ha parlate
e nos ha tacite
Nos ha basiate et imbraciate
le un le altere
e nostre amor
va viver longemente
e sempre prosperar