May 27, 2013

Le regno del aves

Entrante in estive Svedese silvas            
nos ingressa in le regno del aves              
incantate de su suave cantos        
nos cammina con aperte aures   

Inter arbores, hora post hora                 
al latere del pratos insolate                   
tosto se poco a poco revela                   
le ricchessa del species alate          

Paros boreal, major e azur                      
canta melodias sempre in dur                         
sovente columba palumbus ulula                 
al altere arbore picas garrula                  
     
De longe nos audi un agile trilla             
es illo le gaudiose vive fringilla?          
Le merla impone con imitationes            
de paros, emberizas e mesmo verdones   

Le turdo philomelos narra contos         
enthusiasticamente                  
le troglodyta responde tosto                  
con fortia e corpore tremente                  

Un garrulo vola inter duo betulas          
in belle colores vestite                   
ma illo in vice de suave melodias                  
solo vociferar ha apprendite             

E ibi nos audi un gratiose sono                  
le fitis canta con melancholia               
forsan le lamento del diocopo tosto                    
trovara inter folios su via                       

Veni le vespere e le umbras cade                 
al ornithologic paradiso                   
nos parti le bosco, al domo vade
portante un grande surriso
                       

May 26, 2013

Liberate




Io cadeva al campo de battalia
jaceva longemente in agonia
e quando illo subsideva
io me levava
e vadeva verso le mar

Vidente que le limite
inter mar e celo era radite
io sapeva que io es liberate

May 24, 2013

Perdite

Perdite al sentiero del vita
Io ascolta le guida
del voces interne
ma illos son 
mesmo plus numerose
que le voces externe

Le sentiero duce
ad arbustos sic
dunque io me arresta 
e remane immobile

Tosto venira le obscuritate
e le silva deveni 
de plus in plus menaciante

Debe io vader retro
sur le mesme via 
a que io arrivava?

May 23, 2013

Le verbos le plus potente

Le verbos le plus potente
son parturite del silentio,
ex le terra ubi le semines 
del pensatas pur germina

Illos ascende insensibilemente in alto
verso le celo del conscientia clar
e nihil impedi lor seren crescentia 

Illos son pronunciate pensivemente
a voce molle
ma nonobstante isto
illos echoa circum tote le terra

In le silentio habita
le comprension del infinitate
e le verbos cuje radices
cresce ex iste fundos
ha un luminositate intrinsec
que eclipsa omne le altere parolas

Le verbos le plus potente
nasce in mentes humile
e lor vigor non veni
de fortia crude
ma del patientia
que supervive 
gratias al ancorage firme
in amor e compassion

May 21, 2013

Le cerca

Qual explicationes
dara le bosones
ferventement' volante
in l'accelerator?

Sapera deman
omnes le causa
del prime impulso
que creava
le comencio?

May 18, 2013

Amina El


Es io solo un folietto al Grande Arbore
o un de su radices?

May 17, 2013

Le homine qui vadeva sur le aqua

Quando ille vadeva sur le aqua
ille non spectava al undas
ma le undas le videva
e se calmava
pro non humectar
su caftan blau clar
Su nude pedes
non deveniva molle
iste die, quando ille 
vadeva sur le aqua

Ille diceva verbos
que nemo audiva
proque le vento 
los portava al montanias
sed mesmo si alcuno los audirea
iste verbos serea enigmas
proque ille usava allegorias
que era como aves invisibile
ma le vento los comprendeva
e le montanias los comprendeva,
sapiente isto
ille calmemente surrideva

Ille levava su reguardo
e videva trans le dense nubes
le lucentia de milles de stellas
e ille videva Venus e Jupiter
sequente lor orbitas con su vista

Quando le homines in le naves
videva su figura distante
lor timor era transformate a consternation
e illes demandava le un le altere:
"Qui es le homine que vade sur le aqua?"
e illes clamava a ille
ma le vento portava lor voces verso le mar

Forsan totevia ille les audiva
nam ille reguardava al naves
e a su labios de novo
reveniva le surriso calme

May 16, 2013

Le grana

Io ha seminate un grana
e illo ha cadite a in bon terra
un belle flor appareva
e illo cresce die post die
nutrite del sol del amor
e le molle humus del sollicitude

Le cyclo del vita initia un nove torno
le dono de heri
nos dara al deman
le spero vive e nostre viage
continua al mundo
de possibilitates sin limites

May 12, 2013

Mi musa



Belle musa del poesia
tu canto me seduce
al longe, longe via
tu es mi sol luce

Le verbos que yo dice
post un breve momento
al papiro scripte jace:
rigidite sentimentos

Yo scrib' al computator
tu pensatas spiritual
facente poemas d'amor
entrar le virtual...

...mundo facite de codices
binari, unes e zeros
que veni a multe homines
trans electric sentieros

Tu canto excellente
digital devenira
quando tu serviente
al rete entrara

May 11, 2013

Cuna del homine


Oceano solar
fonte del lumine
ardente mar
cuna del homine

Hic occurreva
le complexe substantias
que nos construeva
in calente brillantia

May 10, 2013

Le prime matino

Io la eveliava con un basio
e seminava un surriso sur su bucca
le joia matinal plenava le camera
insimul con le luce matutin del sol 

May 8, 2013

Ego e io

Ego mangiava 
sed habeva fame
Ego bibeva 
sed habeva sete
Ego era amate 
sed tamen infelice
In primavera 
Ego plorava

Durante le dies 
Ego era frigide
ma le noctes 
era plenate de febre
Le obscuritate 
non lo cecava
sed in jornos solar 
Ego videva nihil

Le mundo lo habeva oblidate
ma Ego memorava toto
cosas sin importantia era notate
e le cosas importante, perdite

Nunc Ego ha capitulate
e dunque io vinceva
quando le spero moriva
le matino nasceva

Post multe annos
le celate veritate
finalmente porta a me
le dono de pace

May 7, 2013

Incontro con un monacho

Io vadeva in le valle del umbras
e le vita era pesante
Le futuro involvite in obscuritate
e le fatiga de plus in plus
vinceva super me
Alora io videva un monacho 
al via ante me
ille stava ibi sin mover se
vestite in un roba jalne

Quando io le attingeva
io diceva:
-Venerabile monacho, adjuta me
Despero ha invadite mi mente
e le via me duce a un obscuritate
sempre plus profunde

Ille respondeva:
-Tu pensatas ha texite
un velo nigre que coperi
tote tu facie
Tu es como un aranea 
que ha attrappate se mesme 
in su proprie tela
Prende via le velo
e tu videra que le crepusculo
de facto es un aurora

-Lassa le pensatas cader
del capite al corpore, 
assi como le pluvia vivificante
cade del celo al terra

-Inhala et exhala
Lassa le respiration esser le vento
que curre trans le citate del mente
e mundifica su stratas

-Tu dolor es fortia rigidite
illo es como le nive sur le montanias
Lassa le sol del comprehension 
lucer super iste montes
assi que le nive se liquefacera 
e devenira transformate
al fluxo primaveral que plenara le rivos
gaudiosemente murmurante

-Solo le momento presente existe
Illo sempre ha existite
e sempre existera
ergo, non preoccupa te
del passato o le futuro 

Io me opponeva:
-Ma mi problemas non disparera
solo proque io los negligera

Ille respondeva:
-Problemas solo son portas
al solutiones
Primo transforma te mesme
e postea tu potera transformar le mundo
Ama e assi inspira alteres amar
Adjuta e assi inspira alteres adjutar
Cerca sagessa e dissemina lo 
per tu parolas e scripturas 

Io me inclinava verso le monacho
e pois continuava vader
Pro le prime vice io sentiva
como le radios del sol caleva
mi facie

May 4, 2013

Le familia del flautas dulce

Il es facile sonar le flauta dulce
ma crear suave melodias es difficile
isto require le sufflo de fortia equal
necessari pro un tono stabile
un lingua veloce pro le phrasar:
staccato, legato o mesmo tremolo
e anque rapide digitos que salta
sur le octo foramines
Cognosce tu le familia del flautas dulce?
Granpatre flauta dulce basse
que sona surdemente ma con contento
Ille besonia valvulas
pro poter coperir le aperturas dispersate

Patre flauta dulce tenor
ha un tono molle e amabile
e reconta con placer
historias del passato

Mamma flauta dulce alto
canta belle cantos de cuna
a un voce suavemente sonante

Le filia flauta dulce soprano
sona plus fortemente de su genitores
e non vole audir lor admonitiones
e canta con defia
scalas e arpeggios

Le parve filio flauta dulce sopranino
es un ruitose puerastro
ille curre velocemente de loco a loco
e pipa in falsetto
assi que tote le casa le audi

Ma ha tu illos audite
sonar insimul,
lor voces connecte
in contrapuncto
intricate ma harmonic?
Illos vermente son un familia gaudiose
e omnes parla simultaneemente 
ma totevia cata un es audibile

Illos parla un dialecto musical
que ha radices ancian
e floresceva durante
le medievo, renascentia, e baroco
ma in nostre tempore de novo es usate
e inricchite con nove parolas

Ergo, sia vostre voces audite, car flautas
al gaudio de illos qui ama musica
e plena lor cameras con suave sonos!

May 3, 2013

Le vita es un poema

Le vita es un poema
ma qui es le poeta?

Qui scribeva le conto
del nascentia del galaxias?

Qui scribeva le fabula
del prime animales?

Qui scribe le epos
del evolution?

May 1, 2013

Le formula

Le plus belle et elegante 
formula mathematic
es ille que pote describer 
un principio physic fundamental
con le minime effortio

In un maniera simile, 
le plus belle et elegante lingua
es ille que pote describer un veritate 
o un sentimento fundamental
sin superflue, complicate parolas