Feb 1, 2015

Le futuro



Le futuro es un femina con facie invisibile
Su vestimentos sempre cambia de color
In le mano dextere illa tene spero,
in le mano sinistre illa tene timor

Illa nos attende al via
Quando nos nos ha approximate
illa dice con voce indistincte,
assi como ex grande distantia:
"seque me a in lo celate!"

Su scarpas blanc lassa tracias rubide
Ubi tu nos duce, femina mystic?
Debe nos sequer tu tracias
o pote nos cercar nostre proprie via?
An le viage sera longe?
An'lo nos ducera trans multe belle urbes?
An'lo nos ducera al domo del esseres eternal?

Illa se torna
forsan surridente, forsan plorante,
remove su mantello
e lo pone al terra
Imagines appare a illo
vacillante e cambiante rapidemente
Non es possibile perciper los
Le tempore in su forma condensate
non pote esser decifrate

Quando illa vide nostre reguardos confuse
illa prende le mantello
se torna e continua vader
Nos debe sequer la
Si nos remane hic, morira le tempore
Que nos sempre vade in avante!

Nude illa dansava

Nude illa dansava
Libere, felice
In verde herba 
le pedes colorava
Le capillos le sol 
illuminava
Nemo la videva
Assi illa voleva

Illa dansava 
pro se mesme
e pro nemo plus
Movimentos nasceva 
in profundos del anima
Beltate del corpore
reflecteva le nobile 
aspecto del spirito

Incompatibilitate

Io es un flocco de nive
in le medio del estate
e tu es un radio solar
in le medio del nocte hibernal

Tu es materia
e io antimateria
e quando nos nos incontra
nos deveni nihil

Nostre parolas collide
a medie cammino
e recula retro
al bucca que los creava

Quando io dice 'si'
tu dice 'non'
e quando io dice 'nunquam'
tu dice 'sempre'

Io es un grano de arena
in un vaste oceano
e tu es un gutta de aqua
in un deserto sablose

Alba e crepusculo

Qual es le differentia
inter le alba e le crepusculo?
Tu dice que illos son oppositos
ma in mi oculos illos son intercambiabile

Quando io me addormi io deveni eveliate
e quando io me evelia io entra in le somno
In sonios io es libere
Le crepusculo es mi aurora