Apr 28, 2015

Incontro sensual


Io vole sentir le fragrantia 
de tu humiditate
caressar le ricchessa
de tu fructos
serpentar me circum te
trovar tu secrete locos
audir tu halitos in mi aure
glissar con mi lingua sur tu collo
immerger mi facie in tu capillos
lentemente liberar te
del non-nuditate

Io vole sentir tote tu calor
admirar tu formas unic
sentir tu peso super me
clauder mi oculos
sentir tu manos ubique

Profunde es tu fame
ma ancora plus profunde
mi delecto

Nostre reguardos se incontra
Tu oculos surride jocosemente
Mi tense delecto
balancia al limite del dolor

Como un pluvia estive
veni le relevamento
Illo me surprende al summitate
Lentemente nos plana in basso
Insimul nos reposara 

Extasis mutual

Veni a me in le nocte
pro satiar mi suspiro
Lassa me in le tenebras
explorar tu corpore
con mi manos e mi labios

Tu calor expelle
le frigor del crepusculo
e transforma mi suspiro
a un susurro molle
que ascende
al longe del collo
usque a tu aure

Tocca me!
Caressa me!
Tu pote facer
quecunque tu vole
Le silvas del passiones
attende le passos
de nostre nude pedes

Le folios vole
titillar nostre sinos
Nos pote natar in le rivo
in le amollite ballet
del guttas del delecto
le qual cela le limite
inter nos
e uni nostre joia
in un extasis mutual

Desiros carnal

A tu ubere corpore,
mi manos glissa hic e hac
Se move tu suave sinos
quando tu dansa
Mi corde batte
con le rhythmo del musica
Tu capillos titilla mi facie

Ferve, arde le nocte
Le passion face
nostre corpores tremular
Io te pressa contra me
assi que tu geme
Io vole necar me
inter tu spisse femores

Io suge tu labios luxuriose
Io basia tu ventre
que va retro e avante
con tu halitos hastive

Io te basia plus basso
e tu geme de novo
surprendite del delecto
Io te mangia
assi como un dessert
le plus gustose
Nunquam io sera satiate
e jammais passara tu passion

Le horas del luna e del stellas
ancora longe durara
Nos oblidara le tempore
Nos oblidara le mundo
Nos ultrapassara
omne inhibitiones
e devorara
omne desiros carnal
in iste nocte
quando nostre fusion
complira le suspiro
que es tan grande
como le saturation
que le matino nos servira
a un platto con fructos
in omne colores

Manos de seta

Tocca me con tu manos de seta
Evelia le foco que dormi sub derma
Le nocte ha patientia

Tu caressa es tanto lente
como le cyclo del luna
Mi suspiros de placer
son tan numerose como le stellas

Tu degusta mi desiro,
surride a mi expectationes
Tu me surprende
quando tu explora mi corpore
eveliante sentimentos
que io nunquam habeva experientiate
Finalmente tu te jace presso me

Nunc es mi torno a explorar te
Intensemente io inhala tu fragrantia
Affamate io te prende in mi bucca

Tu es mie! Tu es mie!

Apr 26, 2015

Observationes zoologic



Hic nos vide un elephante
Un animal multo interessante
In su trompa aqua prende
su amico con un ducha surprende

Ecce un gorilla
su filia presso illa
le differentia es minimal
inter homine et animal

Non time le leon
l'animal in question
jam es domesticate
in le zoologic societate

Como salta le ranas!
Illos dansa sardanas
ma oblidava tener le manos
como face ver catalanos

Existe multe aves
alcunos super nubes
vola con ventos:
eterne momentos

Colorate serpente
se move furtivemente
forsan morde tosto
un animal ex le bosco

Le tortuca es tanto lente
Que occurre in su mente?
Le pensatas sembla tardive
ma forsan anque intensive

Curre cavallos salvage
facente un longe viage
trans le prateria american
verso le frontiera mexican

Balenas, grand' animales
son submarin mammales
Al superficie prende aer
Pois al fundo se lassa cader

Koala, dulce marsupial
folios sole masticar
somnolente animal
ramos ama imbraciar

Certo, vos sape que zebras
non cognosce algebra
ma in vice son admirate
pro lor belle pelle striate

Pisces ede pisces
Le parve ede le minime
Le grande ede le parve,
in vice edite del maxime

Ecce un juvene can
que sempre vole currer
Illo es felice e san
e nunquam te va morder

Aranea, celere chassator
certo, su aspecto evelia timor
con diligentia su rete extende,
pois con patientia victimas attende

Ulula, le uluco, huu hu huhuhuhuu
silentio nocturne interrumpente
vigila in vesperes, huu hu huhuhuhuu
durante dies dormi dulcemente

E ora audi le consilio
del parve, ma sage, conilio:
"Cata die mangia salata,
e face l'amor con tu amata"

Cattos blanc, cattos nigre
cattos grande, cattos micre
cattos plena vicos, stratas
cattos plena mi pensatas

Un alce crucia le autostrata
deveni un "animal non grata"
collisiones lethal riscante
con le automobiles passante

Le parlante parochetto
non besonia un libretto
sempre illo verbos repete
anque parolas indiscrete

Tante species del scarabeo
creava nostre sage Deo
insectos era su ver passion
in le acto del creation

Malgrado minuscule, mures
mangia multe matutin mangiares,
murmurante, masticante
multe molle materiales,
meticulosemente mandibulas movente,
minute manieras mundan mimante

Entrava olim un bufon
al multo cultivate salon
In vice de dicer "Bonsoir!"
illo comenciava coaxar

Contra le innocente ericio
alcunos ha le prejudicio
que illo fructos gusta prender
o mesmo a vices vaccas mulger

Ecce un amica mie
Su nomine es Alexandra
Illa es un salamandra
sempre gentil e pie

Le bardotto es le hybrida
inter stallon e asina
in latino hinnus appellate
in Interlingua solment' ora registrate

Tu vide le prime ape
Veni le ver, tu sape
Emana del prime flor
le aroma del amor

Tu jardin

Lassa me venir a tu jardin
Sentir su fragrantias
e tu presentia
Recordar me lo intemporal

Io memora lo que venira
et expecta lo que esseva
Le jardin sempre remanera

Animal nocturne

Io remane in le lecto
tote le die
audi como le vicinos
exi trans le porta
degusta le levar del sol
me addormi et evelia,
addormi et evelia
senti le odor
de distante labor

Finalmente veni le vespera
e le obscuritate
Le hora del animales nocturne
ha advenite
Io me disvesti e curre foras
pro comenciar le chassa

Apr 18, 2015

Telephonomania


In nostre dies le majoritate del usatores del telephonos cellular ha un si appellate smartphone, un telephono intelligente. Con illo on pote, ultra telephonar e inviar SMSes, facer le majoritate del cosas que on face al computator: navigar le internet, ascoltar musica, jocar etc. Il anque es facile a prender photos e registrar films. On mesmo pote pagar su facturas e pagar con illo in certe botecas.
Del internet on pote discargar, gratuitemente o contra un summa minor, si appellate apps, applicationes, isto vole dicer simple programmas con functiones specialisate.

Ultra apps con jocos e altere formas de intertenimento il ha GPS, le systema satellitic de positionamento global, que da le possibilitate de saper exactemente ubi on se trova al mundo e facilemente trovar le correcte adresse, pro exemplo quando on vade alicubi con su auto. 
Si on vole apprender alique il ha apps pro studiar e si on es molestate de mosquitos il ha un app que face le altoparlator del smartphone emitter ultrasonos que repulsa le parve sanguisugas.
Apps pro Facebook, Twitter, Instagram e Kik e alteres da le possibilitate a sempre poter informar le ambiente de su activitates e apprender lo que face omne le amicos, e commentar lo.

Il es facile a realisar que un tal apparato pote esser difficile a poner al latere. Ci il ha alique pro cata uno e illo pote esser usate in multe situationes quotidian. Quando on attende al autobus, in le cauda del supermercato, mesmo in le sala de cinema, le smartphone se revela. Gente lo aspecta quando illos vade al trottoir o mesmo quando illos conduce le auto. Parentes preme al schermettos con oculos fixate e a pena remarca que lor parve infantes essaya communicar se con illos. Sovente homines plange se del facto que lor consortes dedica plus de tempore a su telephonos que a su amante.

Quando le parlamento svedese esseva inaugurate post le vacantia estive in 2013 le photographo del jornal Dagens Nyheter capturava con su camera como un grande numero del consilieros usava su smartphones durante le orationes inaugural.

Sin facer alicun examinationes scientific on pote constatar que un notabile parte del population es dependente del smartphones. Illos se ha accostumate a sempre esser "a linea", actualisate del ultime eventos, in contacto con su amicos del internet, con accesso a (quasi) tote le cognoscentia del mundo e immediate stimulation e intertenimento.
Cata secunda debe esser plenate con activitate. Non plus existe tempore pro relaxation o reflexion, e mesmo in un grado minor pro presentia libere de pensatas in le nunc, ubi le mente pote regenerar, purificar se e crear spatio pro pensatas plus profunde. Le vita sempre accelera usque al momento quando le imagines vacilla ante le oculos como un videoclip hysteric.

Le smartphone es un instrumento potente e versatile, que in le futuro proxime sera indispensabile in le execution del cargas quotidian. Le defia pro nos es: apprender nos a usar lo rationalmente e con moderation, assi que nos non oblidara le multe opportunitates que le mundo real offere a cultivar nos e trovar stimulation in un maniera multo plus variate que trans un schermo que mesura tres uncias.   

(Chronica publicate in Panorama in interlingua, No. 3/2014, maio-junio)